Mga Matahom nga Pulong Binisaya

Photo Courtesy: This is Cebu FB page

Nag-ALINDASAY ko
Dihang akong nadunggan BANSAGON mo
Mipakita na lang ang BIDLISIW sa adlaw
Sama na ko sa manok nga nagDANGUYNGOY sa wa’y tu’og.

NagDAHOM ko nga kadlawon pa
Apan dihang migimaw ang kahayag tunga-tunga sa GIHAY sa kurtina
Ako nang nadungog ang pagsugod sa HAGAWHAW sa mga silingan.

HAGIP-OT ang atong panahong duha
Hangtod karon maHANDURAW ko pa ang kasadya ta
Usahay magHINUKLOG ako 
Paghandom sa HUDYAKA nga gisaw-an ta.

Ako gihapong makita imong KAANYAG
Nga nagpabilin sa akong KAHILADMAN
KAHINAM kaniadto dili matupngan
Bisan pa hangtod sa KAPUNAWPUNAWAN
ug sa KINAUYOKAN sa akong dughan.

Dili nako igsapayan ang oras sa atong KULUKABILDO
Baya, MABULOKON kadto.
MUGNA sa atong pagsinabtanay
NABATYAGAN nako…PAG-AMOMA mo.

Sama ako anaa sa PANGANOD
PANUMDOMAN usahay makalimtan
tungod sa pagSANDUROT sa kahigayonan.
SAPUPO nako imong pag-atiman
Ug giSILSIL ko na kini sa akong alimpatakan.

SUKWAHI sa akong pagtoo
TULUMANON ra diay nimo ang tanan
TUNHAY ka gyod nga nagserbisyo…

Salamat Nurse!

Original post: https://m.facebook.com/story.php?story_fbid=1055194441254148&id=100002908060037

Advertisements

Ang Gugma ug ang Teknolohiya

Ang gugma ug teknolohiya managsama
Dunay kinutoban, warranty may kataposan

Ang gugma kailisan
Ang teknolohiya nagdagan

Ang gugma dili molungtad sa uban
Ang teknolohiya may life span

Ang gugma usahay dili masabtan
Ang teknolohiya mokagar bisan kanus-a

Ang gugma mamili
Ang teknolohiya sa uban dili mogana

Ang gugma usik usahay sa kuwarta
Ang teknolohiya makabuslot og bulsa

Ang gugma makahimugso og bata
Ang teknolohiya motagna unsa ang bata

Ang gugma maampingon
Ang Nokia “cares”

Ang gugma sa tawo mohiusa
Ang Nokia “Connecting People”

Ang gugma daghan huna-hunaon
Ang Samsung “Imagine”.

Ang gugma buta
Ang Globe “go lang ng go”

Ang gugma makaboang
Ang Apple “Think Different”

Ang gugma adunay mansanas
Ang Apple ang sikat karon sa teknolohiya

Ang gugma daghan og hitsura
Ang cell phone models pwerteng daghana

Ang gugma usahay dili katalikdan
Ang cell phone balikon kon mabiyaan

Gimingaw Kanimo

Buot nako kang kalimtan
Apan, kanunay ikawng anaa sa akong panumdoman

Layo na man unta ako
Apan, makita nako kanunay panagway nimo

Talagsaon ang atong istorya
Apan, hamubo lang ang panahon ta

Dili nako makalimtan ang panagkuyog ta
Apan, gabii lang kato ug overnight pa

Dili matukib ang akong kalipay niadtong higayona
Apan, sa wa’ damha kato ra sab diayng higayona

Milabay ang ting-init
Apan, wa’ na gani ka manamilit

Wa’ nako nimo tagda, text man o call
Apan, ako misabot kay uyab nimo magbagolbol

Sa Facebook kita kaniadto alegre
Apan, blocked na intawn ako karon pirme

Mibalik ang tingklase kita nagkita
Apan, igo na lang sa pasiplat daw wa’ magkita

Miabot ang adlaw ako nanamilit
Apan, sa imoha ako wa’ hingpit makasangpit

Nanghilak ang uban, naghuot ang dughan
Apan, sa hilom diay ikaw sab nagbangotan

Milangyaw ako sa kapitolyo, nanimpalad pag-ayo
Apan, sa gihapon ikaw anaa sa akong panumdoman

Sus Dear, gimingaw maazo ko nimo!

Ang Dalaga sa Isla

Wa’ nako damha
Nga diay ikaw gikan sa isla!
Imong bayhon di’ layo sa ubang dalaga
Kinsa sa dagkong siyudad nagdako ug nag-eskwela.

Wa’ nako ka dayon timbayaha
Kay lagi ako nagbaton man og delicadeza
Ang imong huyhoy nga mga mata makabibihag
Pun-an pa sa imong bagang buhok nga way halhag.

Panagsa ra ko kita nimo mokatawa
Apan, tam-is ang imong pahiyom panagsa
Imong mga amiga way kasayoran nga sa hilom
Kitang duha nagpaniid sa usa’g-usa apan naghilom-hilom.

Miabot ang panahon nagka-istoryahanay tang duha
Lingaw kaayo tas binayloay sa atong mga talidhay ug katawa
Di’ bali mangapudpod ang atong mga tudlo sa sige’g chat ug text
Wa’ damha naabtan ta’g kadlawon sa sige’g istorya ug tumang katawa.

Mao to ang sinugdanan nga nagkasuod tang duha
Kinsay magtoo nga atong naamgohan nga may pagbati ta sa usa’g usa
Ugali lang ikaw may kabilinggang gibilin sa isla kinsa dili mahimong talikdan
Igo na lang ako mangindihay nga unta ikaw ugma damlag libre nakong balikan.

Sama sa balod, ikaw sa lapyahan sa isla nagpaanod-anod sa tumang kalipay ug kahangop
Imo na akong gikalimtan ug hingpit nga gitalikdan samtang ikaw nagpauraray sa laing mga bukton ug dughan
Di’ lang nako makalimtan katong gabiing nag-abot ang atong mga tudlo ug palad samtang nagsuroy-suroy sa dakbayan
Ang panag-abot sa atong mga aping ug ngabil dili kahulipan kay talagsaon ra tong mahitabo sa mga binuhat sama kanato.

Gugma Nga Wa’y Kinutoban

bisan motulo pa ang ulan
ako dili kabahaan
kay ako nagpayong daan
sa luha man ako lunopan
aduna gihapoy kabutangan
ning kasingkasing samaran.

hangtod hayag pa ang buwan
magdilaab kining dughan
moawop man ang VECO
dili ang gugma ko kanimo

unlimited kining pagbati
dili mapupos, dili madali-dali
text man o call
ako dili magdumili
bisan kadlawon wa’y pili.

sa lubnganan man
ang akong padulngan
dili nako ka kalimtan
panagsa ikaw akong bisitahan!